'ਦਿਲ 'ਤੇ ਵਾਹੀਆਂ ਤਰੀਕਾਂ ਤੇਰੇ ਆਉਣ ਦੀਆਂ' ਹਰਜੀਤ ਹਰਮਨ
ਹਰਜੀਤ ਹਰਮਨ ਦੀ ਗਾਇਕੀ ਵਿਚ ਅਸਲੀ ਪੰਜਾਬ ਦੇ ਦਰਸ਼ਨ ਹੁੰਦੇ ਹਨ, ਕਿਉਂਕਿ ਲੋੜ ਅਨੁਸਾਰ ਹਰਕਤ, ਆਵਾਜ਼ ਵਿਚ ਭਾਵੁਕਤਾ, ਸਰਲਤਾ ਤੇ ਠਹਿਰਾਅ ਉਸ ਦੀ ਗਾਇਕੀ ਦੀ ਵਿਸ਼ੇਸ਼ਤਾ ਹੈ ਅਤੇ ਉਸ ਦੀ ਗਾਇਕੀ ਸੁਣਨ ਵਾਲੇ ਦੇ ਧੁਰ ਅੰਦਰ ਤੱਕ ਲਹਿ ਜਾਂਦੀ ਹੈ |
ਹਰਜੀਤ ਹਰਮਨ ਅੱਜ ਪੂਰੇ ਮਾਲਵੇ ਖਿੱਤੇ ਦਾ ਸਿਰਨਾਵਾਂ ਹੈ ਹਰਮਨ ਦੀ ਖਾਸੀਅਤ ਇਹ ਹੈ ਕਿ ਅੱਜ ਤੱਕ ਉਸ ਨੇ ਸੱਭਿਅਕ ਗੀਤ ਹੀ ਪੰਜਾਬੀ ਗਾਇਕੀ ਦੀ ਝੋਲੀ ਪਾਏ ਹਨ | ਜਿੱਥੇ ਉਸ ਨੇ ਘਰੇਲੂ ਰਿਸ਼ਤਿਆਂ, ਸਮਾਜਿਕ ਸੂਖਮ-ਭਾਵਨਾਵਾਂ ਨੂੰ ਬਿਆਨ ਕਰਦੀ ਸ਼ਾਇਰੀ ਦੀ ਚੋਣ ਕੀਤੀ, ਉੱਥੇ ਉਸ ਨੇ ਰੁਮਾਂਟਿਕ ਗੀਤਾਂ ਵਿਚ ਵੀ ਸੁਹਜ-ਸੁਆਦ ਮੁਕਮੰਲ ਰੂਪ ਵਿਚ ਬਰਕਰਾਰ ਰੱਖਿਆ ਹੈ | ਉਹ ਹਰ ਉਮਰ ਵਰਗ 'ਚ ਪਸੰਦ ਕੀਤਾ ਜਾਣ ਵਾਲਾ ਗਾਇਕ ਹੈ |
ਗਾਇਕੀ ਵਿਚ ਉਸ ਨੇ ਕੋਈ ਉਸਤਾਦ ਨਹੀਂ ਧਾਰਿਆ | ਉਸ ਨੇ ਆਪਣੇ ਅੰਦਰਲੇ ਕਲਾਕਾਰ ਨੂੰ ਹੀ ਤਰਸ਼ਿਆ ਤੇ ਗਾਇਕੀ ਦੇ ਖੇਤਰ ਵਿਚ ਪੂਰਨ ਤੌਰ 'ਤੇ ਸਫਲ ਹੋਇਆ | ਹਰਮਨ ਨੇ ਡੇਢ ਕੁ ਦਹਾਕਾ ਪਹਿਲਾਂ ਗਾਇਕੀ ਦਾ ਸਫਲ ਆਗਾਜ਼ ਕੀਤਾ ਤੇ ਉਸ ਦੇ ਬਹੁ-ਚਰਚਿਤ ਗੀਤ
'ਮਿੱਤਰਾਂ ਦਾ ਨਾਂਅ ਚਲਦਾ',
'ਏਸ ਰੁੱਤੇ ਸੱਜਣ ਮਿਲਾ ਦੇ',
'ਸ਼ਹਿਰ ਤੇਰੇ ਦੀਆਂ ਯਾਦਾਂ',
'ਨਿਰਮੋਹੀ ਨਗਰੀ',
'ਚੰਨ',
'ਹੂਰ',
'ਪੰਜਾਬ' ਅਤੇ 'ਝਾਂਜਰ' ਆਦਿ ਲੋਕ ਗੀਤਾਂ ਵਾਂਗ ਲੋਕ ਮਨਾਂ ਅੰਦਰ ਵੱਸ ਚੁੱਕੇ ਹਨ | ਉਸ ਦੀਆਂ ਧਾਰਮਿਕ ਐਲਬਮਾਂ 'ਸਿੰਘ ਸੂਰਮੇ' ਅਤੇ 'ਸ਼ਾਨ-ਏ-ਕੌਮ' ਨੂੰ ਵੀ ਸਰੋਤਿਆਂ ਨੇ ਭਰਵਾਂ ਹੁੰਗਾਰਾ ਦਿੱਤਾ |
ਬੱਬੂ ਮਾਨ ਦੀ ਫਿਲਮ 'ਦੇਸੀ ਰੋਮੀਓ' ਰਾਹੀਂ ਹਰਮਨ ਇਕ ਅਦਾਕਾਰ ਵਜੋਂ ਵੀ ਸ਼ੁਰੂਆਤ ਕਰ ਚੁੱਕਿਆ ਹੈ | 'ਯਾਰ ਹੁੰਦੇ ਨੇ ਸਰ੍ਹਾਣੇ ਪਈ ਬੰਦੂਕ ਵਰਗੇ' ਗੀਤ ਦੀ ਵੀਡੀਓ 'ਚ ਨਿਭਾਇਆ ਅਭਿਨੈ ਵੀ ਕਾਬਿਲੇ ਗੌਰ ਹੈ | ਪੈਂਡੂ ਧਰਾਤਲ ਤੇ ਪੰਜਾਬੀ ਸੱਭਿਆਚਾਰ ਦੀ ਬਾਤ ਪਾਉਂਦਾ 'ਜੱਟੀ' ਗੀਤ, ਪਿਛਲੇ ਵਰ੍ਹੇ ਦਾ ਸੁਪਰਹਿੱਟ ਗੀਤ ਹੋ ਨਿੱਬੜਿਆ |
ਪਿਛਲੇ ਦਿਨ੍ਹੀਂ ਹਰਜੀਤ ਹਰਮਨ ਦਾ ਨਵਾਂ ਸਿੰਗਲ ਟਰੈਕ ਗੀਤ 'ਤਰੀਕਾਂ' ਸੰਗੀਤਕ ਮਾਰਕੀਟ ਵਿਚ ਆਇਆ ਹੈ, ਜੋ ਸ਼ਾਹ-ਸਵਾਰ ਗੀਤਕਾਰ ਪਰਗਟ ਸਿੰਘ ਦੀ ਸਾਹਿਤਕ ਕਲਮ ਦੀ ਉਪਜ ਹੈ, ਅਤੁੱਲ ਸ਼ਰਮਾ ਨੇ ਮਨੋਹਰ ਧੁਨਾਂ ਨਾਲ ਸ਼ਿੰਗਾਰਿਆ ਹੈ ਅਤੇ ਨੌਜਵਾਨ ਵੀਡੀਓ ਡਾਇਰੈਕਟਰ ਸਟਾਲਿਨ ਵੀਰ ਸਿੰਘ ਵੱਲੋਂ ਮਨਮੋਹਕ ਵੀਡੀਓ ਤਿਆਰ ਕੀਤਾ ਗਿਆ ਹੈ, ਜੋ ਸਰੋਤਿਆਂ ਵੱਲੋਂ ਖੂਬ ਸਰਾਹਿਆ ਜਾ ਰਿਹਾ ਹੈ |
-ਬੱਬੀ ਪੱਤੋ
ਪਿੰਡ ਤੇ ਡਾਕ: ਪੱਤੋ ਹੀਰਾ ਸਿੰਘ,
ਜ਼ਿਲ੍ਹਾ ਮੋਗਾ |
No comments:
Post a Comment