ਸਫ਼ਰ-ਇ-ਜ਼ਿੰਦਗੀ Journey of Life

ਸਫ਼ਰ-ਇ-ਜ਼ਿੰਦਗੀ Journey of Life

ਜ਼ਿੰਦਗੀ ਇੱਕ ਸਫ਼ਰ ਹੈ ਜਿਸ ਵਿਚ ਅਸੀਂ ਕਈ ਲੋਕਾਂ ਨਾਲ ਮਿਲਦੇ ਹਾਂ ਤੇ ਕਈ ਲੋਕਾਂ ਤੋਂ ਵਿਛੜਦੇ ਵੀ ਹਾਂ। ਚੰਗਾ ਮੁਸਾਫ਼ਰ ਤਾਂ ਉਹ ਹੀ ਹੈ ਜੋ ਜ਼ਿੰਦਗੀ ਦਾ ਸਫ਼ਰ ਦੂਜਿਆਂ ਨਾਲ ਚੰਗਾ ਵਰਤਾਉ ਕਰਕੇ ਪੂਰਾ ਕਰਦਾ ਹੈ। ਜੀਵਨ ਸਫ਼ਰ ਵਿਚ ਤਿੰਨ ਗੱਲਾਂ ਦਾ ਧਿਆਨ ਰੱਖਕੇ ਅਸੀਂ ਇਸ ਨੂੰ ਖੁਸ਼ੀਆਂ ਭਰਿਆ ਬਣਾ ਸਕਦੇ ਹਾਂ।
੧. ਰੱਬ ਸਰਬ ਵਿਆਪਕ: ਗੁਰੂ ਗ੍ਰੰਥ ਸਾਹਿਬ ਵਿਚ ਇਹ ਬਚਨ ਦਰਜ ਹੈ ਕਿ ਸਾਰੇ ਜੀਵਾਂ ਵਿਚ ਰੱਬ ਹੀ ਵੱਸਦਾ ਹੈ।
ਸਭੁ ਗੋਬਿੰਦੁ ਹੈ ਸਭੁ ਗੋਬਿੰਦੁ ਹੈ ਗੋਬਿੰਦ ਬਿਨੁ ਨਹੀ ਕੋਈ ॥ Page 485
God is everything, God is everything. Without God, there is nothing at all.


ਜੇ ਕੋਈ ਰੱਬ ਨੂੰ ਮਿਲਣਾ ਚਾਹੇ ਪਰ ਨਾਲ ਹੀ ਰੱਬ ਦੇ ਘਰ ਨੂੰ ਢਾਹੁੰਦਾ ਵੀ ਜਾਵੇ ਤਾਂ ਉਹਨੂੰ ਰੱਬ ਕਦੇ ਵੀ ਨਹੀਂ ਮਿਲ ਸਕਦਾ। ਜੇ ਮਿਲ ਵੀ ਜਾਵੇ ਤਾਂ ਉਸ ਨੇ ਕਦੀ ਵੀ ਖੁਸ਼ ਨਹੀਂ ਹੋਣਾ। ਹਰ ਜੀਵ ਦਾ ਦਿਲ ਰੱਬ ਦਾ ਘਰ ਹੈ। ਜਿੰਨੇ ਵੀ ਜੀਵਾਂ ਦੇ ਦਿਲਾਂ ਨੂੰ ਅਸੀਂ ਤੋੜਦੇ ਹਾਂ, ਰੱਬ ਦੇ ਘਰ ਨੂੰ ਹੀ ਤੋੜਦੇ ਹਾਂ ਤਾਂ ਰੱਬ ਸਾਡੇ ਤੇ ਖੁਸ਼ ਕਿਵੇਂ ਹੋ ਸਕਦਾ ਹੈ?
 ਇਕੁ ਫਿਕਾ ਨ ਗਾਲਾਇ ਸਭਨਾ ਮੈ ਸਚਾ ਧਣੀ ॥ Page 1384
Do not utter even a single harsh word; your True Lord and Master abides in all.

ਜਦੋਂ ਅਸੀਂ ਹਰ ਇਕ ਜੀਵ ਵਿਚੋਂ ਇੱਕ ਰੱਬ ਨੂੰ ਹੀ ਦੇਖਾਂਗੇ ਤਾਂ ਅਸੀਂ ਕਿਸ ਨੂੰ ਬੁਰਾ ਕਹਾਂਗੇ? ਕਿਸ ਨਾਲ ਕ੍ਰੋਧ ਕਰਾਂਗੇ ਤੇ ਕਿਸ ਦੇ ਸਾਹਮਣੇ ਹੰਕਾਰ ਕਰਾਂਗੇ? ਕਿਸਦੀ ਨਿੰਦਾ ਕਰਾਂਗੇ ਤੇ ਕਿਸ ਦਾ ਨੁਕਸਾਨ ਕਰਾਂਗੇ? ਕਿਸੇ ਦਾ ਨਹੀਂ ਕਿਉਂਕਿ ਹਰ ਜੀਵ ਵਿਚੋਂ ਉਹ ਰੱਬ ਹੀ ਸਾਨੂੰ ਬੋਲਦਾ ਤੇ ਰੱਬ ਹੀ ਵੇਖਦਾ ਨਜ਼ਰ ਆਵੇਗਾ।
ਸਦ ਸੁਣਦਾ ਸਦ ਵੇਖਦਾ ਸਬਦਿ ਰਹਿਆ ਭਰਪੂਰਿ ॥ Page 428
He is always listening, and always watching over us;
the Word of His Shabad is all-pervading everywhere.
ਜਦੋਂ ਅਸੀਂ ਆਪਣੇ ਆਲੇ ਦੁਆਲੇ ਇੱਕ ਵੱਸਦੇ ਰੱਬ ਨਾਲ ਜੁੜ ਜਾਵਾਂਗੇ ਤਾਂ ਸਾਡਾ ਜੀਵਨ ਖੁਸ਼ੀਆਂ ਭਰਿਆ ਹੋ ਜਾਵੇਗਾ।
੨. ਸ਼ੁਕਰਾਨਾ: ਜੀਵਨ ਵਿਚ ਇਸ ਤਰ੍ਹਾਂ ਰੱਬ ਦਾ ਸ਼ੁਕਰਾਨਾ ਹੋਵੇ: ਐ ਮੇਰੇ ਪ੍ਰਭੂ! ਤੂੰ ਕਦਮ ਕਦਮ ਤੇ ਸਾਡਾ ਕਿੰਨਾ ਧਿਆਨ ਰੱਖਦਾ ਹੈਂ। ਤੂੰ ਮੈਨੂੰ ਜੋ ਕੁੱਝ ਦਿੱਤਾ ਹੈ, ਮੈਂ ਤਾਂ ਇਸ ਦੇ ਯੋਗ ਵੀ ਨਹੀਂ ਸੀ। ਜੇ ਤੂੰ ਮੇਰੇ ਅੱਜ ਦੇ ਗਲਤ ਕੰਮ ਦੇਖੇਂ ਤਾਂ ਮੈਨੂੰ ਅੱਜ ਰਾਤ ਨੂੰ ਦੋ ਰੋਟੀਆਂ ਵੀ ਨਾ ਦੇਵੇਂ। ਜੇ ਤੂੰ ਮੇਰੀ ਸਾਰੀ ਜ਼ਿੰਦਗੀ ਦੇ ਗਲਤ ਕੰਮ ਦੇਖੇਂ, ਤਾਂ ਜੋ ਕੁਝ ਮੈਂ ਕਰ ਚੁੱਕਿਆਂ ਹਾਂ, ਮੈਨੂੰ ਤਾਂ ਪੀਣ ਨੂੰ ਪਾਣੀ ਵੀ ਨਾ ਮਿਲੇ। ਪਰ ਤੂੰ ਕਿੰਨਾ ਦਿਆਲੂ ਹੈਂ, ਮੇਰੇ ਸਾਰੇ ਗੁਨਾਹ ਦੇਖ ਕੇ ਵੀ ਮੇਰੇ ਭੋਜਨ ਦੀ ਚਿੰਤਾ ਕਰਦਾ ਹੈਂ। ਮੈਨੂੰ ਸਾਹ ਦੇ ਕੇ ਹਰ ਪਲ ਜ਼ਿੰਦਗੀ ਦੇ ਰਿਹਾ ਹੈਂ। ਮੇਰੇ ਤੇ ਕਿਰਪਾ ਕਰ ਕਿ ਮੈਂ ਹਰ ਪਲ ਤੇਰਾ ਸ਼ੁਕਰ ਹੀ ਕਰਾਂ।
੩. ਚੰਗੇ ਕਰਮ: ਅੱਜ ਦਾ ਦਿਨ ਮੇਰੇ ਲਈ ਇੱਕ ਖਜ਼ਾਨੇ ਵਾਂਗ ਹੈ ਪਰ ਮੈਂ ਇਸ ਦਿਨ ਦੇ ਲੰਘਦੇ ਜਾਂਦੇ ਘੰਟੇ ਭੰਡਾਰ ਕਰਕੇ ਨਹੀਂ ਰੱਖ ਸਕਦਾ। ਮੈਂ ਹੁਣ ਪਿਛਲੀਆਂ ਗਲਤੀਆਂ ਤੇ ਅਫਸੋਸ ਪ੍ਰਗਟਾ ਕੇ ਜਾਂ ਭਵਿੱਖ ਦੀ ਚਿੰਤਾ ਕਰਕੇ ਇਸ ਦਿਨ ਨੂੰ ਗੁਆਉਣਾ ਨਹੀਂ ਚਾਹੁੰਦਾ। ਮੈਂ ਅੱਜ ਦੇ ਦਿਨ ਨੂੰ ਸੋਹਣੇ ਤਰੀਕੇ ਨਾਲ ਵਰਤ ਕੇ ਸਫ਼ਲ ਕਰਨਾ ਚਾਹੁੰਦਾ ਹਾਂ।
ਮੈਂ ਅੱਜ ਦੂਜਿਆਂ ਦੀ ਭਲਾਈ ਦੇ ਕੰਮ ਪਹਿਲਾਂ ਕਰਾਂਗਾ, ਫਿਰ ਆਪਣੇ ਲੋੜੀਂਦੇ ਕੰਮ ਕਰਾਂਗਾ। ਮੈਂ ਯਾਦ ਰੱਖਾਂਗਾ ਕਿ ਜਿੰਨਾ ਮੈਂ ਰੁੱਝਿਆ ਰਹਾਂਗਾ, ਉੰਨਾ ਹੀ ਮੇਰੇ ਅੱਜ ਦੇ ਦਿਨ ਦੇ ਸਮੇਂ ਦਾ ਘੱਟ ਨੁਕਸਾਨ ਹੋਵੇਗਾ। ਦੂਜਿਆਂ ਦੀ ਸੇਵਾ ਕਰਨ ਤੋਂ ਬਾਅਦ ਜਦੋਂ ਮੈਂ ਭੋਜਨ ਕਰਨ ਬੈਠਾਂਗਾ ਤਾਂ ਮੈਨੂੰ ਭੋਜਨ ਬੜਾ ਹੀ ਸੁਆਦਲਾ ਲੱਗੇਗਾ। ਮੈਨੂੰ ਬੜੀ ਮਿੱਠੀ ਨੀਂਦ ਆਵੇਗੀ ਅਤੇ ਮੈਂ ਬਹੁਤ ਹੀ ਸੰਤੁਸ਼ਟ ਰਹਾਂਗਾ। ਅੱਜ ਤੋਂ ਬਾਅਦ ਮੈਂ ਆਪਣੇ ਦੁਸ਼ਮਣਾਂ ਨੂੰ ਮੁਆਫ਼ੀ ਦੇ ਦੇਵਾਂਗਾ ਤੇ ਦੋਸਤਾਂ ਨੂੰ ਮੁਸਕਰਾਹਟਾਂ ਵੰਡਾਂਗਾ। ਇਸ ਤਰ੍ਹਾਂ ਮੇਰੇ ਜੀਵਨ ਵਿਚ ਕੋਈ ਵੀ ਦੁਸ਼ਮਣ ਨਹੀਂ ਰਹੇਗਾ, ਸਾਰੇ ਹੀ ਮੇਰੇ ਮਿੱਤਰ ਬਣ ਜਾਣਗੇ।
ਸਭੁ ਕੋ ਮੀਤੁ ਹਮ ਆਪਨ ਕੀਨਾ ਹਮ ਸਭਨਾ ਕੇ ਸਾਜਨ ॥ Page 671
I am a friend to all; I am everyone's friend.

ਅਖੀਰ ਵਿਚ ਮੈਂ ਆਪਣੇ ਆਪ ਨਾਲ ਵਾਅਦਾ ਕਰਦਾ ਹਾਂ ਕਿ ਅੱਜ ਤੋਂ ਬਾਦ ਮੇਰੀ ਜ਼ਿੰਦਗੀ ਬਦਲ ਜਾਵੇਗੀ।
ਗਿਆਨੀ ਅੰਮ੍ਰਿਤਪਾਲ ਸਿੰਘ ਲੁਧਿਆਣਾ ਯੂ.ਕੇ.